CAGAYAN DE ORO CITY – Gihimakak sa Bureau of Fire Protection o BFP nga hinimuan sa rebeldeng New Peoples Army o NPA ang pagkasunog sa bodega sa Delomer Poultry Builder Farm ug residential house sa Purok 1 Ginugutan,Brgy Casisang,Malaybalay City Bukidnon.
Kini sukwahi sa unang report nga giatake sa NPA rebels ang maong gambalay sa wala matug-an nga rason sa miaging gabii.
Gibutyag ni Malaybalay City Fire Marshal Senior Inspector Lloyd Villaroya nga nagsumikad ang kalayo sa kisame sa residential house.
Matud ni Villaroya nga faulty electrical wiring ang pinakaduol nila nga gitutukang hinungdan sa sunog.Mitala sa 2.2 milyon pesos ang damyos sa maong sunog.
Samtang mismo ang militar ang milimod nga hinimuan sa mga rebeldeng NPA ang pagkasunog sa bodega sa Delomer Poultry Builder Farm ug residential house sa Brgy Casisang Malaybalay City Bukidnon.
Gibutyag ni 403rd Brigade Philippine Army commanding officer Brig Gen Edgardo de Leon nga dili na gahimo ang mga NPA sa pagpangatake sa mga kabtangan sa sibilyan tungod sa mga batikos nga gakadawatan niini gikan sa publiko tungod sa pagsupak sa International Humanitarian Law.
Matud ni de Leon nga nabantayan na sa mga international community ang terroristic act sa mga rebelde busa naglikay na kining mohimo sa ingon.
