CAGAYAN DE ORO CITY – Dili magpadiktar ug samot nga dili magpa-impluwensiya sa bisan kinsa nga grupo ang armadong kusog sa nasud.Kini ang pasalig sa Philippine Army taliwala nga dunay pagdani sa pipila ka politiko nga isalikway na ang liderato ni Pres Bongbong Marcos.
Miingon si Philippine Army spokesperson Col Louie Dema-ala nga pabiling naka-pokus sila sa ilang mga trabaho ug wala mangilabot sa kagubot sa politika.
Siya miingon nga daan na sila gisultihan ni AFP chief of staff Gen Romeo Brawner Jr nga protektahan ang konstitusyon ug ang katawhan batok sa mga gusto molumpag niini.
Samtang bisan ang liderato sa kapolisan ang wala usab mag-apil apil sa mga lihok sa pipila ka mga politiko nga dunay kayugot ug ka-dismaya sa kagamhanang nasud ubos ni Pres Bongbong Marcos.
Namahayag si PRO 10 spokesperson Police Maj Joann Navarro nga katawhan ang ilang mga agalon ug dili motugot nga gamiton sa mga politiko ang organisasyon tungod lang sa naghinobrang interes.
Siya miingon nga hinoon,walay namonitor nga kasikas sa lower units nga dunay bahad sa gobierno alayon sa pahayag sa pipila ka mga politiko sa nasud.
