CAGAYAN DE ORO CITY – Dili mausik ang kahago sa govt agencies nga naningkamot masulbad ang suliran sa insurhensiya sa kabaryuhan nga gikontrolar sa CPP-NPA-NDF.
Kini bisan nga subli gibuksan ni Pres Rodrigo Duterte ang peace talks ngadto sa mga komunista sa laing higayon.
Miingon si 4th ID spokesperson Maj Regie Go nga dako kaayo’g kalainan ang sinultihay sa kahusay ug kalinaw itandi kaniadto.
Suportahan sa kanunay sa militar kon unsa man ang ipakanaug nga mando gikan kang Duterte alang sa nasud.
Samtang pagtinabangay sa govt offices ug local govt units ang epektibo nga pagbungkag sa idolehiya nga gipakatag sa CPP-NPA-NDF sa kabarangayan sa nasud.
Kini subay sa ebalwasyon ni Police Regional Office-10 Director Brig Gen Rolando Anduyan kabahin sa kagubot sa nasud nga mugna sa mga komunista.
Miingon si Anduyan nga igo na ang executive order no. 70 o whole of the nation approach ni Duterte aron tubagon ang insurhensiya samtang makig-negosyar ang gobierno ngadto sa mga sakop ni CPP founder Jose Maria Sison.
Dugtong niini,suportado ni Regional Peace and Order Council o RPOC chairman City Mayor Oscar Moreno ang tahas ni Pres Rodrigo Duterte kang Sec Silvestre Bello III nga subli makigkita kang CPP founder Jose Maria Sison sa The Netherlands.
Kini aron ihanyag ni Bello ang kagustuhan ni Duterte ayha abliha’g balik ang naputol nga peacetalks negotiations sa duha ka panig.
Miingon si Moreno nga mas nasayod si Duterte sa angay buhaton hinungdan gihataga’g laing higayon ang isyu sa hisgutanang pangkalinaw.
