CAGAYAN DE ORO CITY-Gipangandaman karon sa militar ang posibleng suicide bombing nga himoon sa nabiling mga sakop sa ISIS-Maute terror group sa battle area sa Marawi City.
Namahayag si Joint Task Force Marawi Brig. Gen. Rolando Bautista nga dako ang posibilidad nga maglusad sa suicide attack ang mga terorista batok sa militar gumikan sa misamot ka huyang nilang pwersa.
Si Bautista miingon nga kapig 1, 500 na ka improvised explosive device o IED’s ang ilang nakuha gikan sa mga gambalay sa sentrong bahin sa Marawi nga gitanom sa mga terorista.
Giseguro usab ni Bautista nga dili na molungtad ug dugay ang krisis sa Marawi City.
Gibutyag ni Bautista nga anaa na sila sa ‘final push’ sa pagpulbos sa nabiling mga terorista sa battle zone sa maong syudad.
Gipasalig usab ni Bautista nga pagka-human sa krisis, gilayon nilang sugdan ang pag-rahabilitar sa Marawi, kay nahidangat na ang ilang mga ekipo sa miaging adlaw.
