CAGAYAN DE ORO CITY-Posibleng dugu-on ang pagsaulog sa kapaskuhan ug pagsugat sa bag-ong tuig sa kapolisan ingon man sa militar sa nasud.
Kini human dili intresado si Defense Sec Delfin Lorenzana nga mo-rekomendar sa ceasefire ngadto sa CPP-NPA-NDF sulod sa holiday season ning tuiga.
Miingon si 4th ID spokesperson Capt Joe Patrick Martinez nga kon adunay ihatag nga ceasefire,nagkahulugan usab kini nga ipalig-on lamang sa gobierno ang mga komunista nga mohimo’g pag-atake sa militar ug kapolisan.
Una nang gideklarar ni Pres Rodrigo Duterte ang CPP-NPA nga teroristang grupo sugod ning bulana.
Nasayran usab nga namugos si NDFP peace negotiating chairman Fidel Agcaoili nga walay basehan ang pasangil ni Duterte aron ilhong mga terorista CPP-NPA.
