CAGAYAN DE ORO CITY-Gitawag sa Communist Party of the Philippines New People’s Army (CPP-NPA) nga mga kawatan ang mga sundalo nga ubos sa 4th ID,Philippine Army.
Kini human sunod-sunod nga nakompiskar sa 88th IB ang mga bugas,asukal ug mga tambal nga gipangsulod sa plastic containers sa Valencia City,Bukidnon sa miaging mga semana.
Namugos si Ka Malim Mabini,tigpamaba sa CPP-NPA North Central Mindanao Sub-Regional Command nga dili iya sa mga sundalo ang maong mga butang hinungdan nga wala sila’y katungod sa pagkuha niini.
Dugang ni Mabini nga tataw nga pagpihig sa rebolusyonaryong kalihukan ang gihimo sa mga sundalo batok kanila.
Samtang gikataw-an lamang sa 4th ID,Philippine Army ang propaganda sa CPP-NPA nga dili sila angay hikawan sa mga pagkaon nga gikan sa mga tawo o grupo nga ilang gipangayuan.
Kini ang nahimoot nga tubag ni 4th ID spokesperson 1Lt Tere Ingente dihang mi-reklamo si Mabini kon nganong gi-imbargo sa militar ang food supply,tambal ug ubang gamit nila nga gipanglubong sa yuta sa Valencia City,Bukidnon.
Miingon si Ingente nga kon angay pa sa katawhan ang maong mga pagkaon,gilayon kining gihatag sa CPP-NPA ngadto kanila.
Dumduman nga gimando ni 4th ID commander Maj Gen Ronald Villanueva nga dili lung-an ang opensiba batok sa mga rebelde hangtod nga makahukom nga mobalik na sa gobierno.
