CAGAYAN DE ORO CITY-Gipadumduman karon sa 4th ID,Philippine Army nga seryoso sila sa pag-monitor sa elected officials nga direktang naghatag suporta sa mga kalihukan sa CPP-NPA sa Northern Mindanao ug Caraga Regions.
Kini human mismo si Defense Sec Delfin Lorenzana kinsa nagsilbing martial law administrator ang nagmando sa kasundaluhan nga mohimo’g pakisusi sa mga elected official ilabina sa pagtunol sa batakang serbisyo sa katawhan.
Gihimo ni 403rd IB commander Brig Gen Eric Vinoya dungan sa pag-presentar sa 26 ka containers sa food suplay nga nabawi gikan sa CPP-NPA sa Valencia City,Bukidnon kagahapong adlawa.
Miingon si Vinoya nga mismo ang Camp Aguinaldo ang naghatag kanila’g gabayan aron panid-an ang LGU officials nga mihatag suporta sa CPP-NPA ning rehiyon.
Una nang gibutyag ni 4th ID commander Maj Gen Ronald Villanueva nga may mga ihap na sila sa mga elected official nga gipaubos sa monitoring kay giingong tighatagan sa salapi ug mga pagkaon sa CPP-NPA dinhi sa rehiyon.
