CAGAYAN DE ORO CITY-Giakusahan sa Bangsamoro Islamic Freedom Fighters o BIFF ang mga sundalo nga utok sa
pagpamomba diin duha ka tawo ang namatay samtang laing 37 ang samaron sa Isulan,Sultan Kudarat.
Miingon si BIFF spokesperson Abu Misry Mama nga gihimo kini sa mga sundalo aron basehan nga lugwayan ni Pres Rodrigo Duterte ang martial law sa Mindanao.
Dugang ni Mama nga dili nila hinimuan ang pagpamomba batok sa mga sibilyan kay bugtong target lamang nila ang makig-away sa mga sundalo.
Samtang gitumbok sa militar nga ang faction sa grupo sa Bangsamoro Islamic Freedom Fighters o BIFF ang mihimo sa pagpamomba sa katawhan sa Isulan,Sultan Kudarat.
Kini bisan nga gihimakak sa maong grupo nga dili sila ang namomba apan giingong mga sundalo aron malugwayan ang martial law.
Miingon si 6th ID,Philippine Army spokesperson Capt Arvin Encinas nga dugay nang naglaraw mamomba ang BIFF hinungdan gihingusgan sa gobierno ang pagpu-o niini sa Central Mindanao.
Giangkon ni Encinas nga ISIS inspired ang BIFF nga dunay lapad nga tinguha pag-sabotahe sa segurida sa
nasud.
Samtang gihupay sa Cagayan de Oro City Police Office o COCPO ang kabalaka sa publiko batok pagsulod sa
mga sakop sa terorista sa syudad.
Gitin-aw ni Supt Mardi Hortillosa,tigpamaba sa COCPO nga halos kada-adlaw walay hunong ang paghugot sa seguridad sa PNP ug AFP checkpoints sa syudad.
Miingon si Hortillosa nga nagpasabot kini nga maglisod ang mga sakop sa mga dautang elemento sa pagguba sa kahusay ug kalinaw sa syudad.
Dugong ni Hortillosa nga kanunay nagtugaw ang militar ug kapolisan aron ma-implementar ang ilang obligasyon ug katungod nga mositar sa mga kadudahang tawo sa matag checkpoint.
Sa pagkakaron,gihangyo sa PNP ang publiko nga tas-an ang pasensiya sa security check points epekto sa Isulan,Sultan Kudarat.
