CAGAYAN DE ORO CITY-Gipamugos sa Armed Forces of the Philippines Western Mindanao Command nga gusto sa katawhan nga malugwayan ang Martial Law declaration sa Mindanao.
Gibutyag ni AFP Westmincom Lt. Col spokesperson Jerry Besina nga subay kini sa gipasar nga resolusyon sa local govt officials pinaagi sa katiguman sa Regional Peace and Order Council o RPOC tibuok nasud sa Davao City sa miaging semana.
Namugos si Besina nga pagpatuman lamang sa martial law ang kabahin sa epektibo nga lakang aron hingpit mapuhag ang mga terorista ilabina sulod sa WestMinCom nakabase ang grupo sa Maute- ISIS,Abu Sayyaf Group ingon man ang BIFF.
Samtang gisupak sa Citizen for Good Governance ang laraw sa gobierno nga Martial Law extension sa Mindanao.
Gibutyag ni CWGG convenor Atty Antoni Soriano nga dili na angayang lugwayan ang Martial Law gumikan kay malinawon na ang Mindanao.
Miingon si Soriano nga angay ibalik na sa normal ang sitwasyon ang Mindanao ilabina nga nabungkag na ang grupo Maute-ISIS nga nanghasi sa Marawi City.
Sa pikas bahin,gidepensa ni 4th ID,Philippine Army commander Maj Gen Ronald Villanueva ang rekomendasyon sa ilang kadagkuan nga lugwayan ang martial law sa Mindanao.
Kini tungod sa gitakdang paghupas niini sa petsa 31 sa Disyembre ning tuiga.Miingon si Villanueva nga mipaspas ang economic activity sa Mindanao ug nag-ubos ang kreminalidad itandi sa panahon nga walay presensiya sa martial law.
Dugang ni Villanueva nga mismo na ang daghang sektor ang nag-rekomendar nga angay ilugway ang martial law diin iduso usab sa AFP kang Pres Rodrigo Duterte.
Dugtong niini,dili kumbinsido ang grupong Kaparatan Northern Mindanao sa mga rason sa militar nga angay lugwayan ang pagpatuman sa martial law sa Mindanao sunod tuig.
Miingon si Fr Allan Ken Apos,spokesperson sa Karapatan Northern Mindanao nga daghang pagyatak sa tawhanong katungod ang nahitabo nga wala masayri sa publiko.
Kini ang hinungdan nga mihimo sila’g Human Rights Summit aron ipaabot sa katawhan ang tinud-anay nga kahimtang samtang gipatuman ang martial law sa mga lugar sa Mindanao.
