CAGAYAN DE ORO CITY- Gipasalig subli sa militar nga dili na madugay ug mahingpit na nga mapuhag ang teroristang Maute kuyog ang Abu Sayyaf Group nga nanghasi sa mga sibilyan sa Marawi City,Lanao del Sur.
Kini human 10 porsiento na lamang sa mga terorista ang naka-okupar sa maong syudad sukad miulbo ang kagubot.
Gibutyag ni 1st ID,Philippine Army spokesperson Lt. Col. Jo-ar Herrera nga anaa na sa 202 ka terorista ang ilang napatay ug nabawi ang 172 ka high powered firearms nga naglakip sa 50 caliber machine guns.
Natala usab ang 58 ka tropa sa gobierno nga nakalas samtang 26 ang gikan sa mga sibilyan.
Gibutyag usab ni Herrera nga limitado na kaayo ang mga lihok sa mga terorista ilabina nga 10 porsiento na lamang sa bahin sa Marawi City sila nagpondo samtang padayong gigukod sa militar.
