CAGAYAN DE ORO CITY-Gi-imbestigaran na sa Armed Forces of the Philippines kung gikan ba sa mga sakop sa Maute-ISIS ang 10 ka langyaw’ng pasaporte ang ilang narekober sa sa Marawi City.
Gibutyag ni Lt. Col. Jo-Ar Herrera, tigpamaba sa Joint Task Force Marawi nga gisuta pa sa ilang intelligence community kung sakop ba sa lokal nga terorista ang pulos Indonesian passport nga nakuha sa mga sundalo sa mismong battle site.
Dugtong niini, gihimakak sa AFP nga dunay gi-hostage nga Indonesians ang mga terorista.
Dumduman nga mismo si ARMM Assemblyman Zia Alonto Adiong ang mi-ingon nga posibleng duna nay nakasulod nga mga foreign fighters sa Marawi tungod kay nahimo na mang “worldwide affair” ang gubat sa maong lugar.
