CAGAYAN DE ORO CITY – Gikondinar sa 403rd Brigade sa 4ID Philippine Army ang kanunay nga pagpangakusar sa grupong KARAPATAN nga sila ang mipatay sa tulo ka sibilyan nga unang na missing sa San Fernando,Bukidnon niadtong Agosto 2017.
Nakalot ang mga bukog nila retired Army Sgt. Rey Havana Espania, kanhi Police Officer Joey Rey Galendez ug tribal leader Datu Dionisio sa Kitaotao human mi-angkon ang usa ka rebel returnee nga sakop sa New Peoples Army ang mipatay sa mga dinagit.
Si 403rd commander Brig Gen Edgardo De Leon miingon nga daw hilom ang KARAPATAN sa kasong extra judicial killings o EJK nga gi-angkon sa mga NPA.
Gani, gi-awhag ni De Leon ang KARAPATAN nga mu-imbestigar sa lapad nga kasong pagpatay nga gipaluyuhan sa mga rebelde ug kini kasuhan.
Una nang gitin-aw ni De Leon nga angayan pasak-an sa kasong paglapas sa International Humanitarian ang rebeldeng New Peoples Army.
Samtang mag-atubang sa silot nga tibook kinabuhi nga pagkabilango ug multa nga P1-milyon ang masapon nga mutabang sa bisan unsang pamaagi sa mga rebeldeng New Peoples Army.
Kini ang gibutyag ni De Leon sa Bombo Radyo ubos sa nakalatid sa Republic Act 10168.
Namahayag si De Leon nga bug-at nga silot ang atubangon sa bisan kinsa nga makombikto sa korte tungod kay giila nga kontra sa estado ang mga rebelde NPA.
Nagtoo si De Leon nga sangko na sa langit ang perwisyo nga gihimo sa NPA sa gobyerno sa Pilipinas, sukad sa pagkamugna sa maong pundok.
