CAGAYAN DE ORO CITY-Gipangandaman na karon sa militar ang ilang ilusad nga “final assualt” batok sa nabiling teroristang Maute-ISIS sulod sa war zone sa Marawi City.
Gibutyag AFP Chief of Staff Gen Eduardo Año, nga gi-preparahan na sa mga sundalo ang dakong opensiba nga ilang himoon sa musunod nga mga adlaw human nila nabawi ang Grand Mosque, Saint Mary’s Cathedral sa maong dakbayan.
Matud ni Año nga nagnihit na ang ihap sa fighters sa teroristang pundok.
Una niini,gibisita ni Pres Rodrigo Duterte ang mga sundalo usa ka adlaw nang nakalabay dihang nailog balik sa gobierno ang grand mosque ug St Mary’s Cathedral sa miaging semana.
Samtang gikompirmar ni AFP Western Mindanao Command Chief Lt. Gen. Carlito Galvez nga napatay sa militar ang 10 ka gitoohang sympathizers sa Maute-ISIS group.
Kini human sila misulay sa pagsulod sa ‘main battle area’ sa Marawi City agi sa Lake Lanao kagahapon sa kadlawon.
Gibutyag ni Galvez nga usa kini ka despiradong lakang sa mga terorista tungod sa mihuyang nilang pwersa sa ‘battle area’.
Asoy ni Galvez nga samot nga nakapahuyang sa Maute group ang pagkamatay sa amahan sa Maute brothers nga si Cayamora Maute, kinsa gi-ataki sa iyang sakit sa kasing-kasing sulod sa prisohan sa kaulohan.
Gi-verify usab karon sa militar ang report nga patay na ang Maute Leader nga si Abdullah.
Naglaraw ang militar nga mangayog tabang gikan sa ubang kanasuran sama sa Amerika.
Kini aron mapadali ang ilang clearing operations sa sentrong bahin sa Marawi City, diin nagkatag ang gitanom nga bomba sa Maute terror group.
Gibutyag ni Galvez nga ilang gikinahanglan ang tabang sa foreign military experts aron dili mabutang sa peligro ang kinabuhi sa mga sundalo.
