CAGAYAN DE ORO CITY-Dili pa sirado ang gobierno sa pakig-negosyar sa naglangkob sa CPP-NPA-NDF sa hisgutanan sa kahusay’g kalinaw sa nasud.
Kini bisan nga namahayag na si Pres Rodrigo Duterte nga dili na makig-estorya sa kadagkuan sa grupong komunista tungod sa sunod-sunod nga atake sa militar ug kapolisan.
Nagtoo si 4th ID,Philippine Army spokesperson Capt Joe Patrick Martinez nga nadala lamang sa emosyon si Pres Duterte tungod sa gidangatan sa iyang presidential security group ug kamatayon sa 7 ka pulis nga gipang-ambush sa NPA rebels sa Mindanao ug Visayas sa miaging semana.
Samtang gitawag ni kanhi Marine Captain ug karon Magdalo partylist Rep Gary Alejano nga walay klaro ang baruganan ni Duterte sa pagsalikway sa peace negotiations ngadto sa CPP-NPA-NDF.
Kini human namulong si Duterte nga dili na subli makig-negosyar sa mga komunista tungod sa giingong pagka-mabudhion sa ilang kasabutan.
Angay buhaton ni Duterte nga wad-on na niini ang mga miyembro sa iyang gabinite nga mga komunista kon tinood siya nga misalikway sa pakig-negosyar ngadto sa mga CPP-NPA-NDF.
