CAGAYAN DE ORO CITY-Dili luwas sa atraso sa terorismo ang Indonesian national nga si Manhati Madrais alyas Baby kinsa kapikas ni terror leader Omar Maute.
Kini human unang nasikop ug nakasuhan sa illegal possession of explosives si Madrais sa piskalya sa Iligan City sa miaging adlaw.
Gibutyag ni 1st ID,Philippine Army commander Brig Gen Roseller Murillo nga nagsilbing logistic operation supporter si Madrais samtang nakig-away ang Maute-ISIS group sa mga sundalo sa Marawi City sugod Mayo 23 ning tuiga.
Kini ang hinungdan nga gisikop sa militar ug kapolisan si Madrais kay kabahin siya sa gipapangita ni martial law administrator Defense Sec Delfin Lorenzana.
Samtang mokabat sa 22 ka patay’ng lawas ang napalgan sa search and rescue teams sa warzone sa Marawi City kagahapong adlawa.
Miingon si Lanao del Sur 2nd District provincial board member Abdulhamed Amerbitor nga gilayong gipaubos sa foreignsic test ang mga cadaver ayha gilubong sa temporary mass grave sa Macbara Provincial Cemetery.
Gibutyag ni Amerbitor nga gilauman pa nilang musaka ang ihap sa mga patay nga marekober samtang ilusad sa militar ang clearing operation sa Marawi City.
