CAGAYAN DE ORO CITY-Gikompirmar ni AFP spokesperson Maj Gen Restituto Padilla nga naluwas sa ilang tropa si Fr Chito Suganob kuyog ang laing sibilyan nga gi-hostage sa kapi’g tulo ka bulan sa teroristang Maute-ISIS sa Marawi City.
Giangkon ni Padilla pinaagi sa text message nga gipadala sa Bombo Radyo diin nagkanayon nga gihawiran sa gobyerno si Suganob apan gilikayan una nila ang pagpresentar niini sa publiko.
Una niini,pabiling nagdumili si Joint Task Force Ranao deputy commander army Col Romeo Brawner pagkompirmar sa pagkaluwas ni Suganob gikan sa Moske Bato sa miaging Sabado sa gabii.
Dumduman usab nga sa wala pa naluwas si Suganob,gipalugwa sa mga terorista ang iyang video diin naghangyo kang Pres Rodrigo Duterte nga ihunong ang military airstrike apan wala kini hatagi’g bili sa gobierno.
Samtang gikalipay ni Iligan City Bishop Elenito Galledo ang pagkaluwas na Suganob gikan sa pagkabihag sa mga teroristang Maute-ISIS sa kapi’g tulo ka bulan sa Marawi City.
Namahayag si Galledo nga maoy prioridad nila ang kahimsog sa panglawas ug kaluwasan ni Suganob.
Si Suganob ang vicar general sa St Mary’s Cathedral dihang gidagit sa mga terorista niadtong Mayo 23 ning tuiga.
Unang gibutyag ni kanhi Iligan City Mayor Atty Franklin Quijano nga kadaugan sa gobierno ang pagkakuha ni Suganob gikan sa kustodiya sa mga terorista.
