Pagpahigayon og information, education campaign atol sa flag raising aron masayran sa mga estudyante ang angay buhaton kalabot sa seguridad ang usa sa mga nasabotan nga mga estratehiya sa lokal nga kagamhanan sa Cagayan de Oro aron proteksyonan ang mga tinun-an batok sa bisan unsang matang sa hulga sa seguridad sulod sa tunghaan.
Gipatawag ni City Mayor Rolando Klarex Uy ang usa ka emergency meeting uban sa Cagayan de Oro City Police Office Director nga si Colonel Dexter Paje ug CDO Schools Division Superintendent Dr. Roy Gazo aron hisgutan kining maong mga lakang human sa shooting incident sa Tacloban City.
Sumala sa tigpamaba sa mayor nga si Janboy Actub, naglaraw usab ang kagamhanan nga mag-assign og dugang mga pulis sa mga eskwelahan tungod kay nagsugod na ang klase karong panahona.
Samtang nagpadayon ang mga paningkamot, gipadayag ni Actub nga duna usab silay gipangayo sa special education fund aron makapabid og dugang mga blue guards.
Gipunting usab niini nga gihangyo usab sa mayor ang pagdugang sa mga watchman gikan sa Local Government Unit aron mas mapalig-on pa ang seguridad sa mga tunghaan.
