Pag-igmat!
Kini ang mensahe sa Cybercrime Investigation and Coordinating Center (CICC) sa nagkatag nga peke nga resibo gikan sa mga e-wallet nga posted sa social media.
Namahayag si Asec. Renato “Aboy” Paraiso, bag-ong Deputy Executive Director sa CICC nga mao kini ang bag-ong modus nga gigamit sa mga online scammers ug mga palautang aron ilaron ang ilang gi-utangan, ug sila nagdeklarar nga nakabayad na, gamit ang screenshot sa AI-Generated nga resibo gikan sa mga lisensyadong e-wallet.
Namugos si Paraiso nga dakung hulga sa publiko ang mga scam nga naggamit sa AI aron maghimo sa peke nga bank transaction receipts ug screenshots.
Giila kini sa ahensya isip bag-ong porma sa panikas nga lisod mailhan kung walay teknikal nga kahibalo ang usa ka indibidwal.
Milusad na sa imbestigasyon ang CICC sa nagbaha nga reklamo ug mga tawong nagpatabang kay nailad sa peke nga mga resibo.
Ang AI generated receipts nagpamatuod kung unsa ka delikado ang pag-abuso sa paggamit sa AI kay may kapas kining mupahugno sa kinitian ug sa ekonomiya sa nasud.
