NAGPAPAHIMANGNO ang Regional Anti-Crime Unit 10 (RACU-10) karong Love Month o bulan sa Pebrero kabahin sa misaka nga kaso sa AI love scams sa internet.
Namahayag si RACU-10 Assistant Chief PLTCOL Junmark Caña sa Bombo Radyo nga tungod sa pag-uswag sa teknolohiya, nagamit kini sa mga dautang buhat sama sa pagpanglimbong pinaagi sa social media ug mga dating sites.
Matod pa niya, kasagaran nga pamaagi sa mga scammer ang paghatag og peke nga romantikong relasyon o gitawag nga synthetic love scams.
Butyag ni Caña, daghan na karon og paagi ang mga scammer sa pagpangbiktima sa mga netizen, lakip ang pagpangilkil pinaagi sa blackmail, ug ang paggamit sa deepfake nga mga hulagway ug video aron i-clone ang dagway ug tingog sa usa ka tawo, bisan pa wala gyud siya’y kalabotan sa giingong sensitibong hulagway o video nga gamiton batok kaniya.
Tungod niini, nagpahimangno ang RACU-10 nga bisan Love Month o dili, kinahanglan magpabiling alerto ug mapanindoton ang mga netizen sa paggamit sa social media ug dili dayon mutuo sa mga kadudahang ka-chat.Matod pa ni Caña, Valentine’s Day season man o dili, posibleng mabiktima ang bisan kinsa nga kulang og kaalam ug pag-amping sa paggamit sa internet.
