Nakadawat sa grabeng pagbatikos gikan sa pipila ka mga kristiano ug mga kaparian ang gipost sa White House nga AI-Generated Photo ni US President Donald Trump isip Santo Papa.
Gikondinar kini ni Kalookan Bishop Pablo Virgilio Cardinal David ug nag-reply sa pinulungang “NOT FUNNY, SIR” sa post sa White House.
Gawas sa pinulungang englis, nagpost usa sa managlahing lengwahe, sa susamang komento, si David.
Ilado si David isip presidente sa Catholic Bishops’ Conference of the Philippines (CBCP) ug vice president sa Federation of Asian Bishops’ Conferences.
Mahinumduman nga igo ra gitubag ni Trump ang pangutana sa press kung gusto ba niya nga mahimong trabaho ang pagka Santo Papa, gikan sa iyang pagduyog sa lubong ni Pope Francis sa Italya niadtong Abril 26.
