Giklaro sa Department of Social Welfare and Development (DSWD) Region 10 nga dili lamang para sa mga benepisyaryo sa 4Ps ang Assistance for Individuals in Crisis Situation (AICS) program.
Matod ni 4Ps Public Information Officer Oliver Inodeo, bukas ang maong ayuda sa tanang indibidwal nga nanginahanglan og tabang ilabi na sa panahon sa krisis, bisan pa og dili sila sakop sa 4Ps.
Dugang pa niya, bisan ang mga pasyente sa pribado o pampublikong ospital mahimong makaduol sa DSWD pinaagi sa AICS desks o Malasakit Center aron makapangayo og medical assistance.
Giingon usab ni Inodeo nga ang 4Ps usa lamang ka target nga programa sa gobyerno alang sa dugang nga suporta sa panginabuhi, apan dili kini limitasyon sa pagdawat og uban pang serbisyo sama sa AICS.
Gipasiugda niya nga ang mga interesado kinahanglan moadto sa mga opisina o sentro nga naghatag sa maong serbisyo aron matabangan sa ilang panginahanglan.
Busa, nanawagan ang DSWD nga masabtan sa publiko nga ang AICS usa ka inclusive nga programa alang sa tanang Pilipinong nanginahanglan og suporta.
