CAGAYAN DE ORO CITY, Philippines- Abante na sa quarter finals sa women’s boxing 50kgs division ang Pinay Boxer nga si Aira Villegas.
Gipalukapa ni Villegas ang representante sa Algeria nga si Romaysa Boulam human iyang nasakmit ang ‘unanimous decision’ gikan sa mga hurado.
Sa unang hugna gidominar ni Villegas ang away ug paspas nga gipaulanan sa kinomo ang Algerian boxer.
Napugos paggukod si Boulam apan walay pagkaluya nga makita sa nawong ni Villegas.
Natapos ang dula nga halos maguba ang nawong sa langyaw nga boksidor.
Una niini, miangkon ni Villegas nga gikulbaan kini’g maayo sa sinugdanan tungod sa height advantage sa iyang kaatbang.
Gikonsiderar sa RP Boxer nga regalo ang iyang kadaugan tungod kay natakdo ang ilang away sa mismong pagselebrar niini sa iyang adlaw’ng natawhan.
Gumikan kay sulod na sa quarterfinals o medal round, segurado na ang medalyang bronze para kang Villegas, alang sa nagpadayong 2024 Paris Olympics!
