Gisaway sa grupong Akbayan Youth ang reaksyon ni Bise Presidente Sara Duterte kabahin sa mga bag-ong Articles of Impeachment nga gisang-at batok kaniya sa nagkalain-laing civil society groups.
Sumala ni Kyle Chester Cotacte, representante sa Akbayan Youth CDO, ilang gihulagway nga “walay unod ug dili makatarunganon” ang tubag sa bise presidente human kini mopahayag nga dili seryoso ang mga reklamo tungod sa giingong kakulang sa ebidensya, ug gitawag pa kini nga mga “papel nga walay unod.”
Matod pa ni Cotacte, dili malikayan nga mosulti ang ilang grupo ilabi na nga sila mismo ang gi-single out sa pahayag sa bise presidente. Dugang pa niya, bisan pa man nga sa unang tan-aw murag nagpakita og kaisog si Duterte, sukwahi kini sa ilang panan-aw tungod kay ilang nakita nga adunay gibating kahadlok sa likod sa iyang maisog nga mga pahayag.
Giingon pa ni Cotacte nga kung tinuod nga wala siya’y nalapas nga balaod, wala unta’y angay ikahadlok ang bise presidente, ug ang hustong paagi mao ang pag-atubang sa mga isyu pinaagi sa proseso sa balaod.
