Gikalipay sa grupong Akbayan Youth ang pagpaslak pag-usab sa prisohan ni kanhi Senador Bong Revilla kalabot sa kasong malversation of public funds. Sumala ni Akbayan Youth National Chairperson Khylla Meneses, dili na matod pa makabudots-budots pa sa umaabot nga eleksyon ang kanhi senador, tungod kay “season two” na kini sa iyang kinabuhi sulod sa prisohan. Naghinaot ang grupo sa mga kabatan-onan nga dili hatagan sa kahigayunan nga makapiyansa si Revilla, ilabi na nga ikaduhang higayon na niya kini nga nadetiner ug wala gihapon matod pa nagpakita sa kausaban. Padayon usab nga gisinggit sa Akbayan Youth nga dili lamang si Revilla ang dapat atubangon sa arrest warrant, kondili lakip ang tanang nalambigit sa pagkawkaw sa kwarta sa katawhan, aron mapanubag ang tanang responsable sa korapsyon.
