Nanawagan ang grupong Akbayan Youth nga mapasar na sa Kongreso ang dugay nang gipangusad nga anti-political dynasty bills, isip lakang sa pagputol sa halapad nga korapsyon sa nasud.
Sumala kang Akbayan Youth National Chairperson Khylla Meneses, kung tinuod gayud nga seryoso ang mga kongresista sa pagwagtang sa korapsyon, kinahanglan una nilang putlon ang tinubdan niini nga nag-ugat sa mga political clan nga gihimo nang family business ang politika.
Dugang pa ni Meneses, kinahanglan usab nga mapasa ang Party-list Reform Bill, tungod kay nahimo na kini og dalan sa pipila ka mga kongresista nga kontraktor aron modominar sa mga probinsya ug modagan sa lain-laing pwesto sa gobyerno.
Gikondena kini sa grupo kay, matod pa nila, nawala na ang tinuod nga bili sa party-list system nga gilaraw unta alang sa mga sektor nga labing nagkinahanglan og representasyon.
Lakip usab sa ilang gisinggit ang pagpasar sa Freedom of Information Bill, nga dugay na matod pa nilang gipangayo sa katawhan.
Alang kang Meneses, importante kaayo nga mapairal ang maong balaod tungod kay ang maayô ug progresibong pagdumala sa nasud posible lamang kung adunay tinuod nga transparensiya sa gobyerno. (James Oliver)
