Nagtoo ang kapulisan nga dili lamang malikayan apan daghang kinabuhi ang maluwas kung ang mga biktima o naka-witness og bullying incident magsumbong sa ilang mga magtutudlo ug kini marefer sa mga otoridad.
Gipamatud-an ni PRO-10 Spokesperson PMAJ Joann Navarro nga base sa ilang mga datos sa bullying cases sa rehiyon, daghan ang nasulbad pinaagi sa pagsumbong ngadto sa mga otoridad sa sayo pa nga mga panahon.
Agig tubag niini, hugot nga gipatuman sa buhatan ang mga school visitation ug lecture aron masiguro nga nasayod ang mga estudyante sa ilang mga katungod ug sa saktong proseso sa pagreport.
Gipasabot usab sa opisyal nga ang kooperasyon tali sa mga biktima, magtutudlo, ug kapulisan ang yawe aron mapatuman ang hustisya ug makahatag og igong proteksyon sa mga kabataan.
Tungod niini, giawhag sa kapulisan ang publiko ilabina ang mga estudyante nga dili magpanuko sa pagpahibalo sa ilang mga magtutudlo kung makasinati o makakita og bisan unsang porma sa pagpangdaog-daog o bayolenteng lihok.
