CAGAYAN DE ORO CITY – Susihon mismo ni Police Regional Office 10 Director Brig Gen Jaysen De Guzman kung nganong napatay sa nag-respondeng pulis ang gitoohang tulisan sa Brgy Casinglot,Tagoloan,Misamis Oriental.
Kini human nakurat si De Guzman nga namatay na diay ang suspek nga si Mark Jovet Cantivero nga taga-Brgy Puerto bisan naigo lang sa paa dihang napusilan ni Police Staff Sargeant Oscar Kent Mabayo sa ilang komprontasyon.
Miingon ang heneral nga tuyo niini masayran sa imbetigasyon kung wala ba naghinobra paggamit sa puwersa ang maong pulis ngadto sa suspek.
Una nang nangayo’g tabang ang giingong biktima nga si Leo Aguilar kay gitulis daw siya sa suspek hinungdan naka-responde si Mabayo.
Hisayrang mipalag ang pamilya sa suspek kay dili sila makatoo nga magbaton sa kalibre 38 nga armas ug gigamit niya pagsulay’g tion sa nag-respondeng pulis.
