CAGAYAN DE ORO CITY – Gipanganti ni Philippine National Police chief director General Oscar Albayalde nga wad-on sa serbisyo ang mga pulis nga dili maghatag suporta sa ilang pamilya.
Gihimo ni Albayalde ang panganti atol sa iyang pagbisita diha sa Camp Alagar, Barangay Lapasan ning syudad.
Si Albayalde miingon nga wala pa siya’y impormsayon kon misaka ang ihap sa mga reklamo kalabot na sa pakyas nga pagsuporta sa mga pulis sa ilang biniyaan nga pamilya o laing pamilya.
Siya miingon nga maoy iyang nadawatan nga reklamo ang pagtaas sa demand sa gipangayong suporta sa mga asawa tungod sa pagsaka usab sa suhulan sa mga pulis.
Samtang gi-awhag ni Albayalde ang police stations nga nagbaton sa daut ug karaan nga mobile patrol car nga magpadala’g request sa PNP national headquarters.
Apan giangkon ni Albayalde nga mas maayo nga ang lokal nga kagamhanan maoy maghatag patrol sa mga pulis tungod kay dili makaya sa ahensiya ang pag-suplay sa mga patrol cars sa tibook nasud.
Gibutyag usab niini nga makahatag lamang sila’g patrol cars sa kapulisan kung gikinahanglan.Hisayran nga dako’g tabang sa mga pulis ang pagbaton sa patrol cars matag police station.
