CAGAYAN DE ORO CITY-Gisaka na karon sa red alert status ang gipatuman nga seguridad sa lungsod sa Isulan,Sultan Kudarat.
Kini tungod sa kamatayon sa duha ka tawo diin duha niini naila nga sila si Davy Shane Alayon,7 anyos ug Lenie Ombrog,52 anyos tungod sa sunod-sunod nga pagbuto sa bomba kagabii.
Miingon si 6th ID,Philippine Army commander Brig Gen Cirilito Sobejana nga gawas sa mga namatay,laing kapi’g 30 pa ang samaron gumikan sa pagbuto sa improvised explosive devices o IEDs.
Siya miingon nga gigukod pa nila ang suspected bomber apan ulahi na tungod kay nakabusikad na ang bomba.Natala ang daghang biktima sa bombings tungod kay gisaulog ang ika-7 ka tuig nga Hamungaya Festival diin gitambungan sa katawhan.
Wala pa’y pundok nga miangkon sa maong pagpamomba.Samtang gilayong gihugta’g balik sa kapolisan ug militar ang seguridad sa pampublikong lugar sa dakbayan.
Kini epekto sa sunod-sunod nga pagpamomba sa wala pa matino nga grupo diin nag-resulta sa kamatayon sa pipila ka sibilyan ug daghang samaron didto sa Insulan,Sultan Kuradat kagabii.
Miingon si Cagayan de Oro City Police Office o COCPO spokesperson Supt Mardi Hortillosa nga kabahin sa gipangagpas nila nga mohimo’g pagpamomba ang mga kontra sa gobierno aron mobati’g kahadlok ang katawhan sa syudad.
Hinoon,giklaro ni Hortillosa nga walay gihatag nga impormasyon ang intelligence community nga dunay actual nga grupo nga mohimo’g pagpamomba sama sa natigayon sa Basilan ug Sultan Kudarat sulod ning tuiga.
Samtang gihangyo sa Task Force Oro nga gilangkuban sa mga sundalo gikan sa 4th ID,Philippine Army ang publiko nga dili ihunong ang kooperasyon sa gipatuman nga security measures aron mapugngan ang mga dili maayong plano sa mga kontra sa gobierno.
Partikular nga gitumbong ni Task Force Oro head army head Maj Anshary Pumbaya nga dili lamang mga kalihukan sa kapistahan ang gitutukan sa militar apan ang tanang mga kalihukan sa syudad.
Kini ang hinungdan nga mas mihugot ang gihimo nila nga checkpoints kuyog ang kapolisan sa entrance ug exit areas sa syudad aron masumpo ang mga kalihukan sama sa pagsabwag sa terorismo.
