Paslak na sa regular nga selda sa mga kababaihan ang natangtang nga mayor sa Bamban Tarlac nga si Alice Guo o si Guo Hua Ping sa tinood nga kinabuhi.
Ang commitment order nagsumikad sa Pasig City Regional Trial Court Branch 167 hinungdan nga gihikling sa Bureau of Jail Management and Penology si Guo gikan sa custodial facility sa Philippine National Police – Kampo Crame.
Unang namahayag si PNP Spokesperson Police Colonel Jean Fajardo nga igo ra sila mupatuman sa mando sa korte ug hangtud nga walay ipagawas nga kanselasyon sa pagbilango kang Guo sa Female Dormitory sa Pasig, dili nila ibalhog sa ilang pasilidad si Guo.
Una niini, mismo ang legal counsel ni Guo ang mi-apelar sa korte nga ihansak una sa Krame ang iyang kliyente tungod sa kataas sa hulga sa iyang kinabuhi.
Kahinumduman nga human nagnegatibo sa TB testing, gilayong gi-aprobahan sa korte nga prisohon uban sa 43 ka mga PDLs si Guo sa regular nga detention facility.
Si Guo kasamtangang gipasakaan sa Department of Justice sa mga kasong qualified human trafficking, paglapas sa anti-money laundering Act, pagamit sa peke nga pasaporte ug peke nga pagkatawo.
Kasong Grave misconduct nga na-file sa Office of the Ombudsman; kasong pagkanselar sa Birth Certificate ni Guo nga gi-file sa Office of the Solicitor General ug election violation nga gisang-at sa Commission on Elections hinungdan nga nalangkat kini sa iyang posisyon sa pagkamayor sa Bamban.(Bombo Anne Quileste).
