Gi-anunsyo sa National Bureau of Investigation (NBI) ang pagpasakag patong-patong nga kaso kang kanhi Bamban Tarlac Mayor Alice Guo.
Namahayag si NBI Director Jaime Santiago nga gawas kang Guo, adunay pa’y 35 ka opisyal ug mga sakop niya sa munisipyo ang pasakahan sa paglapas sa Anti-Graft and Corrupt Practices Act, illegal land conversion, ug dili hustong pagbayad sa buwis.
Miingon si Director Santiago, nga P10,000 ra ang gibayad nga buwis alang sa 7.9 ka ektarya nga yuta nga gigamit sa Bamban POGO Hub, nga gibalor sa P3.9 bilyon.
Wala usab sila nagbayad sa buwis sa mga building nga gitukod sa maong lugar, ug namugos ang NBI nga grabe ka disbentaha sa gobyerno.
Ang mga reklamo ipasaka sa Office of the Ombudsman. Lakip sa kriminal ug administratibong kaso mao ang gross misconduct, serious dishonesty, ug conduct prejudicial to the best interest of the service. Padayon ang imbestigasyon sa Task Force Guo ug posible pa nga mosunod ang dugang pang mga kaso.
