Wala nay allocables nga makita sa lined items alang sa syudad, ug congressional level gikan sa pahat sa pondo sa Department of Public Works and Highways, sa tuig 2026. Katin-awan kini ni DPWH Secretary Vince Dizon, sa gilusad nga press conference kagahapon. Miingon si Dizon nga ang tanan pondo nga mugawas sa ilang buhatan ipahiluna subay sa aktuwal nga panginahanglan ug dili i-base sa “palakasan system”. Ang pagpagawas sa pondo, dili usab mahimong i-base sa personal nga koneksyon sa mga district engineers nga nakabase sa syudad, lalawigan o sa rehiyon kung asa itukod ang proyekto. Gipasalig sa kalihim nga ang tanan salapi nga makasulod sa pondo sa ahensya adunay mapakita nga sihag nga kompyutation, ug walay overpricing kay mu-agi na sa mas istrikto nga bidding ang usa ka proyekto. Pinaagi sa ilang bag-ong reporma, masaligon si Dizon nga mabalik ang pagsalig sa katawhan sa ilang integridad ug subli musaka ang morale sa mga nahibiling mga trabahante.
