CAGAYAN DE ORO CITY – Nakalas tungod sa daghang igo pinusilan ang 43 anyos nga amahan nga giingong nagsilbing police asset dihang gi-atake sa duha ka armadong suspek sa Sitio Pinikitan,Brgy Camaman-an ning syudad kaganihang kadlawon.
Giila ni Cogon Police Station commander Major Sabido Labitad ang biktima nga si Henry Pimentel nga taga-Upper Brgy Macasandig,bulag sa kapikas apan may unica ija nga anak-babaye ning syudad.
Gibutyag ni Labitad nga subay sa mga nakasaksi nga adunay mga gikagukod ang biktima diin natigayon pa ang komosyon ayha nakadagan pipila ka metros nga distansya ayha napusilan sa wala matino nga kalibre sa armas.
Miingon ang opisyal nga nahiagom sa ubay-ubay’ng mga igo sa dili pa matino nga kalibre sa armas hinungdang sa hinanaling kamatayon ni Pimentel.
Sa pagkutlo ning balita, namahayag ang Cogon Police Station nga nagbaton sa person of interest nga hayan ikasulbad sa maong hitabo.
Nasuta usab nga kanhi midangop sa Nazareth Police Station kay adunay nagbahad sa kinabuhi niini sa miaging mga adlaw.
Kabahin sa gikonsidera sa kapolisan ang isyu sa illegal nga droga apan wala na nila ihikyad pa ang katibuk-ang detalye samtang nagpadayon pa ang imbestigasyon.
Dili kini ang pinakaunang higayon nga adunay gipusil-patay bisan nga ubos sa gun ban implementation ang dakbayan nunot sa May 12 elections.
