CAGAYAN DE ORO CITY -Gikadismaya sa katawhan ug mismong mga elected barangay officials ang daw pagdapig sa inahan ngadto sa iyang kaipon nga responsable pagdunggab-patay sa 2-anyos nila nga anak ug pagkaangol sa laing 4 anyos nga biktima sa Brgy Lumbia ning syudad.
Kini human unang namahayag si Katherine Aying nga nakahukom siya nga pasaylu-on ang kaipon nga si Elmer Canoy Sr kaysa madugta kini sa prisohan tungod sa paghimo sa kremin.
Miingon si Aying nga plano niya isibog ang kasong parricide ug frustrated parricide batok suspek kay aron mag-uli na sila sa maayong kabubut-on.
Miani kini sa grabeng kasuko sa ilang katawhan ug bisan sa netizens sa social media kay gipalabi sa ginang ang pagka-suspected criminal sa kaipon niini.
Sa unang interbyu sa Bombo Radyo,nanganti pa ang inahan nga ipadugta niya sa bilangguan ang iyang kaipon nga walay kalooy mipatay sa ilang anak nga si Elmer Canoy Jr.
Apan ning bag-o,wala matago ni Lumbia Brgy Kag. Aeron Tarrolba kinsa anak sa kasamtangang kapitan Alexander Torralba ang pagka-dismaya sa hukom sa ginang.
Depensa sa ginang nga nalooy kini sa gidangatan sa iyang duha ka anak apan nagpasulabi usab ang gibating kahingawa ug gugma niini ngadto sa iyang kaipon.
Hisayrang patay tungod sa daghang dunggab sa gunting ang 2- anyos samtang nakalinggawas na gikan sa kritikal nga kondisyon ang 4-anyos nga igsoong babaye niini samtang detinado pa sa mini-cell sa PNP ang ilang amahan.
