CAGAYAN DE ORO CITY – Misamot paghuyang ang kalihukan sa rebeldeng New Peoples Army sa kabukiran sa Misamis Oriental.
Gihimo ni 58th IB Philippine Army spokesperson 1 Lt Jefferson Mariano ang komento nunot sa kamatayon sa babayeng rebelde sa engkuwentro nga natigayon sa Brgy Bal-ason, Gingoog City.
Gibutyag ni Mariano nga unang naila ang NPA member nga si Brenda Serenio,24 anyos ug molopyo sa Sitio Kamansi, Brgy Banglay, Lagonglong ning lalawigan.
Nagtoo ang militar nga daghan pa ang mga samaron sa maong engkuwentro tungod sa mga lama sa dugo nga nakit-an sa encounter site.
Narekober sa encounter site ang M-14 rifle; landmine, signus radio, solar panel charger, 13 ka sako sa bugas; medical supplies, personal nga gamit ug subersibong dokumento sa mga rebelde.
