CAGAYAN DE ORO CITY – Kutob na lang sa pagmahay ang land caretaker sulod sa prisohan kay nahinaykan niini’g hunos-kinabuhi ang ilang silingan didto sa Malaybalay City,Bukidnon.
Basi sa imbestigasyon sa kapolisan, nasuko ang biktima nga si alyas Boy Isog nga gibadlong sa suspek nga si alyas Dodong Kalma ang amahan niini nga nanigway sa binuhing hayop sa gibantayang yuta sa lugar.
Apan mangayo’g despensa, gisulong na hinoon ni Boy Isog ang balay sa suspek ug nahagit ang pagkalalaki niini.
Kini ang rason nga nadunggaban sa suspek ang biktima ug dili pa igo gigulgol pa ang li-og niini.
Nasuta nga managsama nga nakainom ang duruha dihang nagkalantugi tungod lang mga mananap nga gipasulod sa pribadong yuta.
Kasong pagpatay ang gihan-ay sa kapolisan nga isang-at sa piskalya batok detinado nga suspek.
