CAGAYAN DE ORO CITY – Gihulat na lamang sa PDEA Central Luzon ang resulta sa pag-resolbar sa prosecutor’s office kon may probable cause ang kasong giatubang sa walo ka suspected illegal drug pushers nga naglakip sa kamagulangang anak lalaki ni City Mayor Oscar Moreno nga si Sean sa Angeles City,Pampanga.
Kini human napaubos na sa inquest proceedings ang mga suspek dihang nakasuhan sa PDEA tungod sa pagkasikop sa drug buy bust operation diin nakuhaan sa balor milyon pesos nga ecstasy tablets ug ubang klase sa ilegal nga droga.
Miingon si PDEA Central Luzon spokesperson Glenn Guillermo nga gilayon nila nga ibalhin sa Angeles City Jail kon hingpit masaka sa korte ang mga kaso nga ilang napasaka sa piskalya batok sa mga suspek.
Una usab niini,gibutyag ni PDEA spokesperson Derrick Carreon nga dako sa bahin sa National Capitol Region ug Luzon provinces ang paglihok sa grupo sa mga suspek aron mamaligya’g mga ilegal nga droga.
Samtang namugos ang 43 anyos nga Sean Moreno nga wala siya’y kalambigitan sa gisudlan nga ilegal drugs operation sa giingong hinigugma niini nga si Bernice Fabiosa nga kabahin sa nadakpan sa buy bust operation sa PDEA-Central Luzon sa Angeles City,Pampanga.
Kini subay sa gisaysay ni Moreno sa sinaligan sa ilang pamilya nga si Art Mercado nga nakaduaw kaniya sa mini-cell sa PDEA Region 3 sa miaging semana.
Namahayag si Mercado nga nakaabot si Sean sa Angeles City kay giingong natahasan kini nga mobaligya’g sakyanan sa ka-transaksyon niini.Una nang gibutyag usab ni Guillermo nga mibati siya’g dakong kaulaw alang sa ilang pamilya tungod sa gilambigitan niini nga kontrobersya.
