CAGAYAN DE ORO CITY – Gipangita pa sa mga operatiba sa Cogon Police Station ang mga responsabli mipusil-patay sa kanhi dunay giatubang nga kasong pagsupak sa Dangerous Drugs Act of 2002 nga sikad-drayber sa Ilang-Ilang Street,Adela Subdivision,Brgy Camaman-an sa syudad kagabii.
Unang giila sa kapolisan ang biktima nga si Junjun Rodriguez, 29 anyos,dunay kaipon nga nagpuyo sa maong lugar.
Saysay sa imbestigasyon,kalit gisudlan sa armadong lalaki ang balay ug gilayong gipusil-patay ang biktima ug nadamay pa ang kaipon niini diin naigo sa paa.
Wala pa’y gilugwa nga impormasyon usab ang kapolisan kon unsa ang bag-ong atraso sa biktima sa iyang gidangtan.
Hisayrang anak sa kanhi pulis ang biktima ug giingong temporaryo kining nakagawas sa city jail kay gitabangan sa iyang amahan sa miaging katuigan.
