CAGAYAN DE ORO CITY – Gipangita sa kapolisan ang anak-lalaki sa aktibong pulis nga gitudlong suspek pagdunggab-patay sa city scholar nga dalaga diha sa Balongis,Brgy Balulang ning syudad.
Kini human tudlua sa mga nakasaksi nga si Regie de las Alas,19 anyos ang midunggab sa dughan ngadto sa biktima nga si KC Clear Eclonar,19 anyos,civil engineering student sa dakong unibersidad nga managsamang nagpuyo sa maong brgy.
Gibutyag ni Carmen Police Station commander Police Maj. Mario Mantala Jr nga giko-ordinar na nila ang amahan sa suspek aron mapadali ang pag-surender niini ug tubagon ang pasangil kaniya kaniya.
Una nang gitoohan nga celphone lang ang tuyo sa suspek apan kay nasapon sa biktima hinungang gidunggab ang dughan niini kagahapon sa hapon.
Nanggawas usab ang impormasyon nga laraw luguson sa suspek ang biktima sanglit naka-tapis tualya lang kini apan kay misukol maong gidunggab.
Apan dili pa makompirmar sa kapolisan ang maong mga teorya rason nga nagpadayon pa ang imbestigasyon.
