CAGAYAN DE ORO CITY – Gihangyo sa opposition provincial candidates sa Misamis Oriental ang Commission on Elections ingon man ang liderato sa Armed Forces of the Philippines nga ipa-recall o ibalhin sa laing area of assignment si 4ID commanding officer Brig Gen Michelle Anayron Jr.
Kini human nagtoo ang grupo ni Misamis Oriental gubernatorial candidate Juliette Uy nga dayag nga ‘conflict of interest’ ang pagsilbing top army official ni Anayron Jr samtang mayoralty candidate usab ang iyang amahan nga si Atty. Michelle Anayron Sr sa Sugbongcogon ning lalawigan sa Mayo 12 nga piliay.
Gibutyag sa petisyon nga gidangop sa kampo ni Uy ug iyang line-up ngadto kang Comelec 10 regional director Atty Renato Magbutay ug AFP chief of staff General Romeo Brawner Jr ang maong isyu kay aron kalikayan nga magamit ang impluwensiya sa militar sa eleksyon sa probinsya.
Namugos ang kampo sa kanhi kongresista sa distrito dos nga dili na nila gusto masubli ang nahitabo sa 2022 elections diin adunay lima ka aktibong sundalo sa 58th IB,Philippine Army nga nagamit sa politika sa lungsod sa Villanueva.
Maoy gitumbok ni Uy ang pagsilbing 4ID commander niadto ni retired Army Major General Wilbur Mamawag kinsa ig-agaw tagsa ni incumbent Provincial Gov. Peter Unabia nga maoy miparot kaniya sa piliay sa probinsya sa maong tuig.
Sa maong hitabo, asst division commander ni Mamawag si Anayron Jr.
Dumduman nga subli magkatigi sa pagka-gobernador si Unabia ug Uy sa 2025 midterm elections sa probisnya.
Sa pagkutlo ning balita, wala pa’y komento si Anayron Jr ug Comelec kabahin sa politikanhong-lakang sa bando ni Uy.
