CAGAYAN DE ORO CITY – Dili kinaiya ni 4th Infantry Division,Philippine Army commanding general Brig Gen Michele Anayron Jr nga manghilabot sa aspeto sa politika gamit ang impluwensiya.
Kini ang opisyal nga tubag sa heneral batok sa recall petition nga gihandos sa grupo sa Team Unity nga gipanguluhan ni kanhi Misamis Oriental 2nd District Congresswoman Juliette Uy nga kandidato pagka-gobernador sa May 12 elections sa lalawigan.
Miingon si Anayron nga iyang ikapaniguro ngadto sa petitioners nga dili ingon ana ang taras sa mga sundalo nga ubos sa dakong dibisyong-militar nga dunay kontrol sa tulo ka lalawigan sa Northern Mindanao ug hurot sa Caraga region.
Siya miingon nga sulod sa sobra 30 ka tuig nga pagsilbing sundalo, giampingan niini ang iyang trabaho isip kabahin sa tig-depensa sa seguridad sa nasud.
Kini ang hinungdan nga gisupak niya ang panaghap nga itugot niini nga magamit ang Philippine Army kay midagan pagka-mayor ang iyang amahan nga si Atty.Michele Anayron Sr sa lungsod sa Sugbongcogon sa midterm elections.
Pagpasabot sa Misamisnong heneral nga dili niya ikatugot nga adunay ilang mga sundalo nga magpagamit aron maka-bentaha ang pipila ka kandidato sa resulta sa eleksyon.
Miingon si Anayron nga kinaiya ug palisya niini nga kulban sa kaldero ang mga sundalo nga ubos sa ubos sa dibisyon nga mohimo’g hinangal.
Dumduman nga unang namahayag ang abogado sa maong grupo nga si Atty Angel Lim nga ipadakop nila sa kapolisan ang heneral kung makit-an nila ang presensiya niini sa probinsya.
Nanganti usab ang grupo nga kung dili monaug sa pagka-kumander sa dibisyon si Anayron,magtisar sila sa Office of the Ombudsman.
Kini tungod kay alang sa grupo dayag nga ‘conflict of interest’ ang pagka-kumander ni Anayron.
Gipasabot usab sa heneral nga makuti ang iyang giagian ayha natudlo nga kumander kay gipaubos pa kini sa pag-utingkay sa Board of the Senior Officials ngadto sa Board of Generals padulong sa buhatan ni Defense Secretary Gilberto Teodoro Jr ayha sa lamesa ni Pres Bongbong Marcos.
Gi-instolar si Anayron hulip kang acting commander Brig Gen Consolito Yecla nunot sa pag-retiro ni 4ID commanding general Major General Jose Maria Cuerpo II sa miaging Enero 17 ning tuiga.
Hisayrang si Anayron ang sakop sa Philippine Military Academy “Tanglaw-Diwa” Class of 1992 diin pinakaunang tahas ang pagsilbing civil military operations officer sa Visayas region.
