CAGAYAN DE ORO CITY – Mangunay pagresolbar si Commission on Elections o Comelec chairman George Garcia kuyog ang ubang nat’l govt agencies sa isyung ‘conflict of interest’ nga giatubang ni 4ID commander Brig Gen Michele Anayron Jr.
Kini human angkona ni Comelec 10 asst regional director Atty Maria Dulce Banzon nga wala sa ilang katakos ang pagsulbad sa maong isyu.
Miingon si Banzon nga naduso na nila sa ilang central office ang petition for recall nga gipamugos sa grupo sa mga kandidato sa Misamis Oriental batok kang Anayron Jr.
Aktibong deputy govt agency sa Comelec ang 4ID nga lig-ong kaabag sa Police Regional Office 10 sa paghatag seguridad sa taliabot midterm elections sa Northern Mindanao.
Sa pikas bahin,gihinaut sa Police Regional Office 10 nga masulbad sa daling panahon ang isyu nga giatubang sa liderato sa 4ID,Philippine Army nga aktibo nila nga kaabag sa pagbantay sa 2025 midterm elections sa rehiyon.
Miingon si PRO 10 spokesperson Major Joann Navarro nga anaa sa maayo ug lig-on nga security relations ang na-establisar nila sa Kampo Evangelista hinungdang dakong kawad-on kung adunay mga kausaban sa liderato niini.
Una nang gikompirmar sa PRO 10 ug Philippine Army nga andam na sila paghatag seguridad sa ilusad nga piliay sa Mayo 12.
