CAGAYAN DE ORO CITY – Kasado na ang kulbahinam nga pagbahug-bahog sa kinomo nila kanhi super flyweight champion Jerwin Ancajas ug WBA world bantamweight champion Takuma Inoue didto sa Japan ning adlawa.
Pulos nakab-ot sa duruha ang 118 pounds weight limit diin mirehistro ang duha ka boksidor sa 117.4 pounds kagahapong adlawa.
Ang panagsangka ipahigayon sa Ryogoku Kokugikan sa Tokyo.
Si Ancajas dunay rekord nga 34 ka daug, tulo ka pildi ug duha ka tabla ug 23 niini pinaagi sa knockouts.
Samtang si Inoue adunay 18 ka daug, usa ka pildi ug upat ka knockouts. Magsilbing undercard sa dula sila two-time world title holder Pinoy boxer Jonas Sultan batok sa iyang kaatbang nga si Riku Masuda nga pulos mitimbang sa 117.4 pounds.
Sa pikas bahin, masaligon si boxing coach Nonito Donaire Sr nga mudaug ang manok sa Pilipinas ning adlawa.
