Gisaulog sa nasud ang Independence Day apan gipangutana karon kung tinuod ba gyud kita nga gawasnon tungod sa mga isyu sa kagamhanan ug kalisod.
Matod ni Atty. Samson So Tan, usa ka abogado gikan sa Cagayan de Oro, nga kon tan-awon sa aspeto sa pilosopiya, tinuod nga gawasnon ang Pilipinas tungod kay aduna kitay katungod sa pagpili sa kaugalingon natong dalan sa demokrasya.
Gipasabot hinuon niya nga sa aspeto sa balaod, dili kita bug-os nga gawasnon tungod kay gigapos kita sa mga kasabotan sa nagkadaiyang nasud ug sa mga organisasyon sama sa United Nations.
Dugang pa ni Atty. Tan nga sama sa usa ka langgam, aduna kitay gahom sa pagpili kung asa paingon apan limitado kini sa mga balaod ug sa reyalidad sa palibot.
Busa, gitataw niya nga ang labing mahinungdanon mao nga kining mga limitasyon kinahanglan nga makatarunganon ug dili makalapas sa katungod sa uban.
