CAGAYAN DE ORO CITY, Philippines – Nagbahad si Department of Education o DepEd Secretary Sonny Angara nga manubag ang mga nalambit sa anomalya sa Senior High School voucher program sa ahensya.
Gitin-aw ni Angara nga seryoso ang DepEd sa imbestigasyon ug mopasaka’g kaso batok sa mga mapamatud-ang nagpahimulos sa sistima.
Dugang pa sa kalihim nga dali masabtan kung adunay sayop entrada sa usa o duha ka nalista nga pangalan sa magtutungha, apan, kuwestiyonabli matud pa ang records sa 12 ka mga pribadong tunghaan nga mipasa sa dili tiaw nga ihap sa mga ghost students nga nakadawat sa maong voucher.
Kahinumduman nga niadtong kalihim pa si Bise Presidente Sara Duterte sa DepEd, ubay-ubay na ka mga tag-as nga opisyal ang iyang nasipa tungod sa iregular nga paggamit sa pondo.
