CAGAYAN DE ORO CITY – Ipasaka sa kapolisan ang kasupakan sa anti-hazing law of 2018 batok sa mga kadete nga gitudlong mga responsable sa pagkulata-patay kang PMA Cadet 4th Class Darwin Dormitorio sa Baguio City.
Kini human anaa na sa 90 porsyento nga natapos ang imbestigasyon sa kapolisan kabahin sa hitabo.
Gibutyag ni Baguio City Police Office Director Police Col. Allen Rae Co nga igo na ang mga ebidensya nga ilang natigom aron kasuhan ang PMA upperclass men nga mikutlo sa kinabuhi sa 20-anyos nga kadete.
Bisan niini, namahayag si Co nga bukas pa gihapon sila sa posibilidad sa pag -abot sa mga bag-ong ebidensya nga makatabang sa pagpalig-on sa kaso.
Samtang gipasalig ni Co nga makonbikto ang upperclass men nga responsable sa pag-hazing kang Dormitorio.
Kini kon basehan ang mga ebedensya nga ilang nahuptan pinaagi sa gihimong imbestigasyon sa hitabo.
Miingon si Co nga ilang nahimo ang tanang angayan nga himoon sa maong kaso.
Nakasiguro ang maong opisyal nga maangkon sa pamilyang Dormitorio ang hustisya sa kamatayon ni Darwin.
