CAGAYAN DE ORO CITY – Dili pa ma-implementar sa Police Regional Office 10 ang “anti-laway barrier” sa mga motorista sugod karong Hulyo 12, adlaw Lunes.
Sa pakighinabi sa Bombo Radyo kang PRO-10 spokesperson Police Lt. Colonel Mardi Hortillosa II, siya miingon nga bisan mipakanaug sa mandato ang Department of Interior and Local Government (DILG) nga ipatuman ang pagdakop samga motorista nga walay proto-type shield sa mga motorsiklo sa Hulyo 10, padayon nilang sundon ang kamanduan gikan sa PNP Kampo Krame.
Miingon si Hortillosa nga nagpalugwa sa direktiba ang PNP headquarters nga likayan una nila pagsikop ang mga motorista nga wala pay mga “anti-laway barrier” tungod kay dili tanan klase sa motor ang andam alang sa “modification”.
Hisayran nga ang PNP ang gitahasan sa Inter Agency Task Force nga mupahapsay sa dagan sa dalan ug mosikop sa mga public ug private transport nga wala misubay sa minimum health safety protocol batok COVID-19.
