(Update) CAGAYAN DE ORO CITY – Gipalig-on pa sa nagkadaiyang grupo ang ilang pagsupak batok sa presensiya ug pagpasulod sa tropang Kano sa Pilipinas pinaagi sa pagpadayag ug paghatag impormasyon sa publiko.
Kini may kalabutan sa gilusad nga anti-war, anti-US bases congress nga gitambungan sa mga pundok nga naggikan sa Northern Mindanao sa usa ka hotel sa syudad.
Kabahin sa mga mitambong si Herman Laurel,presidente sa Asian Century Philippines Strategic Studies Institute nga ilado nga dakong supak sa pagpalig-on sa Amerika sa Asya gamit ang pagsilbing alyado niini sa Pilipinas.
Gibutyag ni Laurel nga peligro sa katibuk-an ang pag-uyon sa gobierno nga makasulod ug maka-posisyon ang typhoon missile launchers sa Amerika sa pipila ka bahin sa Pilipinas kay mipalag niini ang China ug Rusya.
Namahayag s Laurel nga angay masayran sa Pilipinas nga dili interes niini ang gihingusgan sa Amerika apan pagbutang lang sa alanganin kung mograbe ang tensyon gamit ang claim issue sa West Philippine Sea.
Gihimong pananglitan niini ang dakong pagsupak sa Rusya nga magpagamit ang Ukraine sa Amerika ug North Atlantic Treaty Organization o NATO apan nagmagahi pagsanong rason nahitabo ang magpila ka tuig nang gubat.
Kini daw angay likayan sa gobierno nga tataw nga ‘proxy war strategy’ sa Estados Unidos aron magka-gubat ang magkasilingang China ug Pilipinas gamit ang WPS issue ug pagpasulod sa mga kagamitang pang-giyera.
