Gipahimangnoan sa Archdiocese of Cagayan de Oro ang mga tumutuo kabahin sa usa ka tawo nga nagpakaaron-ingnon nga pari ug giingong adunay koneksyon sa Simbahang Katoliko sa syudad.
Sumala ni Fr. Derjohn Faborada, Social Communication Officer sa Archdiocese of Cagayan de Oro, nasuta sa ilang imbestigasyon nga ang maong personalidad dili ordinadong pari ug wala usab na-incardinate sa Archdiocese sa Cagayan de Oro o bisan unsang recognized ecclesiastical jurisdiction sa Simbahang Katoliko Romano.
Iyang gilaraw nga ang advisory nga gipagula sa simbahan dili pagdaot sa maong tawo, kundili pagpahibalo ug pagpanalipod sa mga tumutuo batok sa posibleng kalibog ug sayop nga pagtoo.
Dugang pa niya, ang maong indibidwal giingong sakop lamang sa usa ka grupo nga gitawag og Servants of Mary Mother of the Poor, apan wala kini otorisasyon sa paghimo og mga sakramento isip pari sa Katolikong simbahan.
Gitataw ni Faborada nga importante ang pag-amping ug pagbantay sa mga magtutuo tungod kay posibleng mahimong invalido ang pipila ka sakramento kon himuon sa tawo nga walay legal ug simbahanong awtoridad.
Tungod niini, giawhag sa Archdiocese ang publiko nga siguruhon una ang pagkalehitimo sa mga relihiyosong personalidad aron malikayan ang kalibog ug sayop nga praktis sa pagtoo.
