CAGAYAN DE ORO CITY-Gikompirmar na sa kapolisan nga person of interest nila sa kasong pagpatay kang late USTP president Dr Rotoras ang nasikop sa CIDG-10 nga si Architect Rey Galua ning syudad sa miaging adlaw.
Kini human gipatawag ni City Police Director Sr Supt Roy Bahian ang naglangkob sa Special Investigation Task Group o SITG-Rotoras kabahin sa background nga ilang nakuha kang Galua.
Miingon si COCPO spokesperson C/Insp Mardi Hortillosa nga limitado lamang una ang ilang masulti sa publiko sa basehan kon nganong hayan may kalambigitan si Galua sa kamatayon ni Rotoras niadtong Disyembre 2, 2017.
Samtang gilugwa karon sa SITG-Rotoras ang computer sketch sa panagway sa usa ka babaye nga gitratar nila nga testigo sa kamatayon ni USTP president Rotoras.
Miingon si C/Insp Hortillosa nga tuyo niini nga mapatim-aw kanila ang maong wala una panganli nga babaye aron makatabang sa pagsulbad sa kamatayon ni Rotoras.
Gibutyag ni Hortillosa nga adunay nasayran ang maong babaye ilabina sa mga suspek pagpatay kang Rotoras hinungdan nga giawhag nila ang pagpubliko pagsulti sa SITG kon ugaling namay-ungan kini nga dagway.
Dugtong niini, namugos si CIDG chief investigator SPO4 Noel Oclarit nga nagbaton sa nagkadaiyang armas si detained Architect Rey Galua nga person of interest sa kamatayon ni late USTP president Dr Ricardo Rotoras.
Kini sukwahi sa gipamugos ni Atty Arturo Ubaub, agogado ni Galua nga planted ang pipila sa mga nakuhang armas sa pinuy-anan niini sa Brgy Lumbia sa syudad.
Miingon si Oclarit nga dili molugwa sa mando ang korte sa pagsusi sa pinuy-anan ni Galua kon bakak ang mga gisulti sa informants ngadto sa huwes.
Si Galua ang giingong nagbaton sa mga armas kay nag-plano kini pagdagan pagka-mayor sa lungsod sa Kitcharao, Agusan del Norte.
